Labarai

Hukumar Hisbah ta haramta ɗaukar maza a baburin Adaidaita Sahu, ‘da tarar ₦5000’

Hukumar Hisbah ta jihar Kano ta sabunta dokar hana cakuda maza da mata a cikin baburin Adaidaita Sahu.

Hukumar ta bukaci gamayyar kungiyoyin direbobin mashin mai kafa uku (A daidaita Sahu) da su guji ci gaba da cakuda Maza da Mata wajen gudanar da haya a ababen hawansu daga 1 ga watan Janairun sabuwar Shekarar 2020 mai kamawa.

Dabo FM ta jiyo Babban Kwamandan Hisbah na jihar Kano Shaikh Harun Muhammad Sani Ibn Sina yana bayyana hakan a lokacin da yake ganawa da gamayyar Kungiyoyin direbobin mashin mai kafa 3.

Wanda hukumar ta gayyato su domin sanar da su cewa an sabunta dokar nan da ta yi hani da cakuda Maza da Mata a cikin Ababen hawa, Kuma za ta fara aiki daga ranar 1 ga watan sabuwar shekara mai kamawa.

Shaikh Ibn Sina ya bayyana cewa “An samar da wannan doka ne tun cikin shekara ta 2002, kawai dai an sake sabunta ta ne don ganin an tabbatar da babban aikin hukumar Hisbah na Umarni da kyakkyawa da kuma hani ga mummuna.”

Ya kara da cewa “Kasantuwar yadda aka yi watsi da bin wannan doka, wanda kuma hakan ba karamar fitina yake haifarwa a cikin al’umma ba.”

Kwamandan na Hisbah ya ce “Daga wannan rana da aka ambata, dakarun Hukumar za su fito domin su tabbatar da cewa an bi wannan doka sau da kafa.”

“Inda a matakin farko za a fara da yin nasiha, sannan kuma sai biyan tarar kudin da ba su gaza N5,000 ba ga duk wanda aka samu da laifin bijirewa wannan doka.”

A nashi jawabin Shugaban gamayyar kungiyoyin direbobin Mashin mai kafa uku na jihar Kano, ya bayyana cewar za su sanar da dukkan mambobinsu game da wannan doka, kuma a matsayin su na Musulmi suna goyon bayanta kuma za su bada dukkan hadin kan da ake bukata.

Karin Labarai

Masu Alaka

Gwamnatin Kano ta janye dokar hana cakudar maza da mata a baburan ‘Adaidaita Sahu’

Muhammad Isma’il Makama

Muna aiki ta karkashin kasa domin sasanta Sarki Sanusi da Ganduje -Shekarau

Muhammad Isma’il Makama

Ganduje zai tura kwararru 40 kasar Burtaniya don koyo sana’o’in da zasu koyawa Matasan jihar Kano

Dabo Online

Hukumar Hisbah ta chafke wani babban Ɗan Sanda a ɗakin otal tare da mata 3

Muhammad Isma’il Makama

Masarautar Bichi tayi fatali da umarnin kotu, ta cire rawanin Sarkin Bai da wasu Hakimai 4

Muhammad Isma’il Makama

Yanzu-Yanzu: Jiga-jigen APC sun dira a Habuja da duku-duku kan shari’ar zaben Kano

Muhammad Isma’il Makama
UA-131299779-2