Mawallafiyar fitaccen littafin turanci na Brighter Grammar, Phoebean Ajibola Ogundipe, ta rasu da shekaru 92.
Mawallafiyar ta rasu ne a birnin Carolina ta Arewa a kasar Amurka ranar 27 ga watan Maris na 2020 kamar yadda makusantanta suka sanar.
Mawallafiyar tayi shura wajen rubuce-rubucen turanci da suka taimakawa dalibai a nahiyar Afrika, daga cikin wasu litattafan da ta rubuta ‘New Practical English for Senior Secondary School’.
Ta rasu ta bar ‘ya’ya 4 da jikoki 10.
Kafin rasuwarta ta kasance mataimakiyar babban mashawarcin gwamnatin Najeriya kan harkar Ilimi. Ta kuma yi babbar sakatariyar Hukumar kyautata ilimi da kimiya da al’adu ta majalisar dinkin duniya a Najeriya.
Phoebean Ajibola Ogundipe ta kuma karbi lambar girma ta OON a shekarar 1979, ta kuma kafa makarantar kwarewa a kan harkar Ilimi bayan tayi ritaya.
