Zamu fara kama iyayen da basa saka ‘yayansu a makaranta – Malam Adamu

Gwamnatin tarayya zata fara kamen iyayen da suka ki saka ‘yayansu a makaranta.

Da yake bayyana jawabi a taron  manema labarai na ma’aikatar ilimi, Ministan Ilimin Najeriya, Malam Adamu Adamu yace nan bada jimawa ba gwamnati zata fara kama iyayen da suka ki saka yaransu a makarantu.

“Baza’a dena samun rashin saka yara a makaranta ba har sai an mayar da rashin saka yaran babban laifi ga iyayensu. Idan aka fara kama iyayen, to lallai zasu hankalta.”

“Har yanzu akwai wadanda addini da al’ada ke hana a saka su a makaranta.”

“Wannan shine kudurin ma’aikatar Ilimin Najeriya nan bada dadewa ba, hukuncin masu aikata hakan, zasu kare a gidan kaso.”

Malam Adamu, ya bayyana irin yadda aka kashe kudi kimamin Naira biliyan 360 daga 2009-2014 wajen gina ajujuwa, siyen litattafai dama wasu abubuwa da suka shafi harkar ilimi a Najeriya. Kudin daya ce anyi ta’annatin su, dayawa anyi amfani dasu ba ta hanyar data dace ba.